Жыл сайын бүкіл әлемде 15-ші мамырда Халықаралық отбасы күні атап өтіледі. 1993 жылғы 20 қыркүйекте отбасы проблемаларына қалың жұртшылықтың назарын аудару мақсатында БҰҰ Бас Ассамблеясымен бекітілген бұл мереке әрбір мемлекеттің демографиялық саясатымен бірге әлеуметтік-экономикалық дамуына қомақты ықпал ететін қазіргі қоғамдағы негізгі іргетасы ретінде отбасының маңыздылығын айқындайды.
Отбасы – әр адамның өміріндегі ең асыл қазына, мейірім мен тәрбиенің алтын бесігі. Ұлттық құндылықтарды сақтап, оны келер ұрпаққа жеткізуде отбасының рөлі зор. Берекелі шаңырақта сыйластық пен сүйіспеншілік артып, ұрпақ тәрбиесі де өз мәнін табады. Ұлт пен мемлекет отбасынан басталады.
Құрметті қазақстандықтар, Халықаралық отбасы күнімен құттықтаймыз!
Әр шаңыраққа амандық, татулық, мол бақыт пен береке тілейміз. Отбасыларыңыз әрдайым қуанышқа, бірлікке және жылулыққа толы болсын!