2019 ж. 23 мамыр Архив қалашығының конференц залында ҚР Мәдениет және спорт министрлігінің тапсырысы бойынша Ш. Айманов «Қазақфильм» киностудиясы дайындаған «Жизнь специального назначения» атты деректі фильмнің көрсетілімі болды.
Деректі фильм ауған соғысының ардагері, 177 арнайы жасағының командирі, «Қара майор» атағымен белгілі отставкадағы полковник Борис Төкенұлы Керімбаевтың тағдыры туралы айтып берді. Сценарий авторлары мен режиссерлер-қоюшылар: Әсет Ерназаров және Ғазиз Насыров.
Іс-шараға барлық Орталық мемлекеттік архивтердің мамандары, ауған соғысының ардагерлері, сонымен қатар, фильмнің түсіру тобының өкілдері қатысты. Ауған соғысының ардагерлері мемлекет тарихының осы қайғылы кезеңі бойынша естеліктерімен бөлісіп, архив қызметкерлеріне осы тақырыптарға жиі жүгінуге, сол оқиға қатысушылардың деректі куәліктерін және «тірі тарихтарын» жинау туралы тілектерін білдірді. Өйткені, бүгінгі ұрпақ сол сұм соғыста, өзінің әскери борышын орындаған азаматтарды біліп, құрметтеп, есте сақтауы тиіс.
Архивістер өз тарапынан фильмнің түсіру тобын осы күрделі тақырыпқа қоғамның назарын аударып, қазақстандықтардың, ауған соғысының ардагерлерінің өмірлері мен ерліктерінің белгісіз фактілерін ашып көрсеткеніне алғыстарын білдірді.