Қазақстан Республикасы Президентінің 1994 жылғы 14 қаңтардағы Жарлығымен Жаңа тарих Орталық мемлекеттік архивінің негізінде құрылған Қазақстан Республикасы Президентінің Архиві 25 жылдық мерейтойын атап өтуде. Мұнда Қазақстанның ХХ–ХХІ ғасырдағы саяси тарихының құжаттары сақталуда. 2019 жылғы 1 қаңтардағы деректер бойынша архив қоры 810 мыңнан астам сақтау бірлігін құрап отыр.
Архив Қазақстан Республикасы Президентінің, оның Әкімшілігінің және мемлекет басшысына тікелей бағынысты басқа да мемлекеттік органдардың қызметтерін архивтік қамтамасыз ету жөніндегі міндеттерді орындайды. Ел Президентіне тікелей бағынысты мемлекеттік органдардың, сонымен қатар қоғамдық бірлестіктердің, Қазақстан халқы Ассамблеясының құрылымына енетін ұлттық мәдени орталықтардың құжаттарын жинақтайды.
Осы айтулы күнмен өз әріптестерін Орталық мемлекеттік ғылыми-техникалық құжаттама архивінің директоры Б. А. Жұматаева құттықтады.
Архивтің 25 жылдығына арналған мерейтойлық іс-шаралардың бірі ретінде «Қазіргі кезеңдегі архив ісі: мәселелер, тәжірибелер, инновациялар» тақырыбындағы II халықаралық ғылыми-практикалық конференция өтті.
Оның ресми ашылуы 2019 жылы 17 қазанда Алматы қ. өтті. Конференция жұмысына Қазақстан, Қырғызстан, Польша, Ресей және Өзбекстан мемлекеттерінің архив ісіндегі жетекші сарапшылар мен тәжірибелі мамандар қатысты.
Конференцияда әлемдік архив ғылымының жетістіктері және экономика мен қоғамның жеделдетілген технологиялық жаңғыруының тәжірибелерін, тиімді ақпараттық іздеуді ұйымдастыруды, ақпараттық ресурстарды іріктеу, сканерлеу, каталогтау, архивтік мәліметтер базасына қолжетімділік және тағы да басқа өзекті мәселелерді қарастыру, сонымен қатар архив ісінің жағдайы мен даму келешегін талқылау ұсынылып отыр. Басты назар архивтердегі цифрлық ресурстарды интеграциялау жағдайы мен болашағына, біртұтас ақпараттық кеңістіктің бөлшегі ретінде ақпараттық архивтік ортаны құруға аударылады.
Секциялардың бірінде «Электронды құжаттардың сақталуын қамтамасыз етудің өзекті мәселелері» тақырыбында ОМҒТҚА директоры Б. А. Жұматаева хабарлама сөз сөйледі.