2019 ж. 17 қазанында ОМҒТҚА қызметкерлері Ж. Қаламбаева және Б. Толбаева ҚР Мемлекеттік орталық музейі Алматы қаласы әкімдігінің қолдауымен ұйымдастырған Қазақстанның атақты суретшісі, мүсінші Бақытжан Әбішевтің «Дала үні» атты мемориалдық көрмесінің ашылуына қатысты.
Б. Әбішев – ҚР Суретшілер Одағының мүшесі, ҚР Ленин комсомолы сыйлығының және Ж. Жабаев атындағы Халықаралық сыйлығының лауреаты, ҚР мәдениетіне еңбек сіңірген қайраткері, ҚР Өнер академиясының алтын медалі мен дипломымен марапатталған. Оған Қазақстанның мәдениеті мен бейнелеу өнерін дамыту ісіне қосқан зор үлесі үшін ҚР Мемлекеттік сыйлығы, ҚР Президентінің Бейбітшілік және рухани келісім сыйлығы берілген.
Б. Әбішев 1970 жылдан бастап студенттік, республикалық, бүкілодақтық және халықаралық көрмелердің тұрақты қатысушысы, сондай-ақ көптеген байқаулардың лауреаты, көрнекті монументалдық жұмыстардың авторы. Бақытжан Әбішев – қазақ халқының батырларына арнап қойылған көптеген ғажайып ескерткіштердің авторы. Алматы қаласында Жамбыл және Тоқаш Бокинге, Жаңа-Қорғанда Ұлы Отан соғысы құрбандарына, Ақтөбе қаласында Әлия Молдағұловаға, Бұхар Жырау, М. Көпеев, Баянауылда С. Торайғыровқа, Қарағанды қаласында жазушы С. Сейфуллинге қойылған ескерткіштер, сонымен қатар Алматы қаласындағы Әль-Фараби, Махамбет, Күләш Байсейтова, жазушы А. Шарипов, Нұр-Сұлтан қаласында Ата Түрік, Жаяу Мұса тұрпаттырының авторы. Станок жанрының шеберінің көптеген жұмыстары қазақстандық және шетелдік музейлерде «Олимпиадашы» атты өзгеше еңбегі Швейцарияның Лозанна қаласындағы Олимпиадалық комитеттің штаб – пәтерінде тұрған, Германияның жеке коллекциясындағы «Күйші», Мәскеу қаласындағы «Томирис». Әсіресе 1836–1837 жылдардағы көтеріліс басшылары Махамбет Өтемісұлы мен Исатай Таймановтың монументальдық комплексіне сіңірген еңбегі өлшеусіз.