2021 ж. 3 шілдеде ҚР ОМҒТҚА директоры Б. А. Жұматаева Нұр-Сұлтан қаласында өткен «Архив ісінің өзекті мәселелері және даму жоспарлары» атты республикалық кеңеске қатысты.
Кеңес Премьер-Министрдің орынбасары Е.Л. Тоғжановтың төрағалығымен, Мәдениет және спорт министрі А.Р. Райымқұлованың, Архив ісі және құжаттаманы басқару комитетінің төрағасы Қ, Бораштың, ҚР Парламент Мәжілісінің депутатарының, Республиканың мемлекеттік архивтер басшыларының, тарихшылардың, архив ісінің ардагерлерінің қатысуымен Қазақстан Республикасының Ұлттық архивінде өтті.
Кеңес барысында отандық архив саласының қазіргі жай-күйінің өзекті мәселелері, архив ісі және құжаттама саласындағы нормативтік-құқықтық базаны жетілдіру, архив мекемелерінің функцияларын автоматтандыру және заманауи ақпараттық технологияларды қолдану, «Архив-2025» кешенді жоспарын жүзеге асыру аясында мемлекеттік архивтерді материалдық-техникалық жабдықтау мәселелері талқыланды. Сонымен қатар, Саяси қуғын-сүргін құрбандарын толық ақтау жөніндегі мемлекеттік комиссия жұмысының нәтижелері және басқа да өзекті мәселелер баяндалды.
Іс-шара аясында архив ісінің дамуына елеулі үлес қосқан сала ардагерлерінің үлкен тобына «Архив саласының үздігі» төсбелгісі табыс етілді.