2025 жылғы 11 маусымда Орталық мемлекеттік ғылыми-техникалық құжаттама архивінің қызметкерлері Халықаралық архивтер күніне орай өткізілген Орталық мемлекеттік архиві директорының орынбасары, «Архив саласының үздігі» төсбелгісінің иегері Мәрзия Жылысбаеваның архив құжаттары негізінде дайындап, жарыққа шығарған «Из истории царской таможни в Казахской степи» атты жинағының тұсаукесер рәсіміне қатысты.
Жинаққа Қазақстан Республикасы Орталық мемлекеттік архивінде сақтаулы 1749-1917 жылдар аралығын қамтыған Қазақ даласындағы патшалық кеден тарихына қатысты архивтік қорлардың құжаттары енгізілген.
Басылымның негізгі мақсаты – Қазақ жерінде кеден бекеттерінің құрылуы мен жойылуына, оның құрылымына, Орта Азия және Қытаймен сауда-саттыққа, ресейлік елшілердің мәліметтеріне, тауарларды шетелге шығару және алып-келу бойынша салық салу мәселесіне, тауарлардың бағасына, шетелдік саудагерлерге, қазақтардың кеден саласында жұмыс жасауына қатысты архив құжаттарын топтастырып зерделеу, көпшілікке насихаттау болды.
Жинақтың тұсаукесеріне ғалымдар, архившілер, тарихшылар, өлкетанушылар, студенттер, магистранттар, докторанттар және БАҚ өкілдері қатысты.