Орталық мемлекеттік ғылыми-техникалық құжаттама архивінің қызметкерлері Айгүл Абдрахманова, Айсара Байсарина және Мадина Абдразақ жас архившілердің VIII Халықаралық Жазғы мектебінің жұмысына қатысып, 100-ден аса отандық және шетелдік мамандар қатарында білімдерін шыңдауда. Қазақстан Республикасы Президенті Архиві, Ресей мемлекеттік гуманитарлық университеті және әл-Фараби атындағы Қазақ Ұлттық университеті бірлесіп өткізген ауқымды шараға Ресей, Қырғызстан, Молдова, Түрікменстан, Өзбекстанның архив мекемелерінің өкілдері келген.
Мектептің басты бағыты цифрландыру болғандықтан жас мамандар құжаттық мұраны заман талабына сай сақтаудың қыр-сырын үйренді. Қазақстан мен шетелден келген жетекші ғалымдар мен архившілердің баяндамаларын тыңдап, өз қоржындарын архив саласындағы жаңа әдістер мен жаңа технологиялармен жұмыс жасау бойынша тәжірибелерін толықтырары сөзсіз. Мысалы, Ресей мемлекеттік гуманитарлық университеті Тарих және архив институтының басқаруды құжаттамалық қамтамасыз етудің автоматтандырылған жүйелері кафедрасының меңгерушісі Михаил Лариннің баяндамасынан цифрландыру жағдайында құжат айналымды басқарудың нормативтік базасын дамыту жөнінде мол ақпарат алды. Басқа да сарапшылардың лекциялары барысында киберқауіпсіздік, құжаттарды цифрландыру бойынша жаңа ақпарат жинақтап, сарапшылардан практикалық сабақтар алды.
Қазақстан Республикасы Президенті Архиві мектеп қатысушыларына жаңа ғимараттың көрме залы, сақтау қоймалары мен зертханаларына арнайы экскурсия ұйымдастырды.
VIII Халықаралық Жазғы мектептің барлық қатысушыларына сертификаттар табысталды.