Еліміздің барлық өңірлерінде бүгін Ұлттық домбыра күніне арналған түрлі мәдени іс-шаралар өтуде. Орталық мемлекеттік ғылыми-техникалық құжаттама архиві «Домбыра – бабалар мұрасы» атты дөңгелек үстел өткізді.
Қазақ халқы домбыраны көне заманнан бері қуанышта да, қайғыда да бірдей қолданып келеді. Олар домбыраның сыңғырлаған үнімен халқымыздың тарихын, салт-дәстүрін, мызғымас құндылықтарын жеткізген. Ал домбырада ойнау өнері мен күйлер ұрпақтан-ұрпаққа аманат болып жалғасып отырған.
Әрбір шаңырақтың төрінде ілулі тұратын домбыра ұлттық өнерді ұлықтайды. Халқымыз бабаның көзіндей, қазақтың өзіндей болған қастерлі дүниенің қадір-қасиетін құрметтей білген. Домбырасы жоқ шаңырақты мұрасы жоқ үй деуге болады. Ғасырлар бойы сақталған даланың рухы мен бабаның ғұрпын бүгінге жеткізген ұлттық құндылықтың тамыры тым тереңде жатыр.
Орталық мемлекеттік ғылыми-техникалық құжаттама архивінің қызметкерлері қазақтың киелі қара домбырасының шығу тарихына, қазақтың талай күйшілері мен ақын-жырауларына, қара домбыраның үнін күмбірлетіп келешек ұрпаққа жалғастыратын ұрпақтар сабақтастығына қатысты өз ойларымен бөлісіп, халқымыздың атақты күйлерін шертті.
Бұндай тағылымы терең, мазмұнды шараның өтуі - ұлтымыздың терең тамырлы мәдениетін асқақтатып, рухын көтерері анық.