2025 жылғы 11 қыркүйекте Орталық мемлекеттік ғылыми-техникалық құжаттама архивінің директоры Жұматаева Баян Амантайқызы Белгілі балалар жазушысы, Қазақстан Республикасы Президенті сыйлығының лауреаты, «Қазақстанның еңбек сіңірген қайраткері», публицист, жазушы, қоғам қайраткері Бейсенбай Сүлейменовпен алдағы уақытта жеке тектік құжаттарын архивке мемлекеттік сақтауға тапсыру бойынша кездесті.
Архив директоры республикамызда халық шаруашылығының, ғылым мен техниканың аса құнды және соңғы жетістіктерін көрсететін ғылыми-техникалық құжаттаманың орталықтандырылған есепке алынуын, сақталуын және пайдаланылуын қамтамасыз ететін бейінді архивтің қызметімен таныстырды және архивте жеке тектік қорлары сақталатын елімізге еңбектері сіңген тұлғалар жөнінде қысқаша айтып өтті.
Бейсенбай Жолдасбекұлы архив басшысына өзінің кітаптарын сыйға тартты, ал Баян Амантайқызы белгілі ғалым, филология ғылымдарының докторы Тұрағұл Қоңыровтың жеке тектік құжаттары негізінде дайындалған «Тіл білімі тарихында есімі ерекше тұлға» құжаттар жинағын тарту етті.