19 қараша. Алматыда Тәуелсіздіктің 30 жылдығын мерекелеу аясында ҚР Мәдениет және спорт министрлігінің Архив істері және құжаттаманы басқару комитетіне қарасты ҚР Орталық мемлекеттік архивінің 100 жылдығына арналған салтанатты іс-шара өтті. Іс-шараға Мәдениет және спорт министрі Ақтоты Райымқұлова, шетелдік қонақтар, республикалық және облыстық архивтер басшылары мен ардагерлері қатысты.
Мерейлі мереке Қазақстан Республикасы Орталық мемлекеттік архивінің ғимаратына орнатылған «1921-2021 жж. Қазақстан Республикасының Орталық мемлекеттік архивіне 100 жыл» атты мемориалды ескерткіш тақтаның ашылу салтанатынан басталды. Сонымен қатар соңғы уақытта шетелдерден алынған кұнды архив кұжаттарының көшірмелерінен даярланған «Жауһар жәдігерлер» атты көрме мен архивтің 100 жылдық мерейтойына орай дайындалған және басып шығарылған құжаттардың ғылыми жинақтарының тұсаукесері өткізілді. Мұның ішінде «Орталық мемлекеттік ғылыми-техникалық құжаттама архиві» дайындаған көрме мен қатар «Қазақстан архивтері» атты анықтамалық кітап та қонақтардың назарына ұсынылды.
Салтанатты жиында Қазақстан Республикасының Президенті Қасым-Жомарт Тоқаевтың құттықтау хаты оқылды. Іс-шара барысында Мәдениет және спорт министрі Ақтоты Райымқұлова мерейтойға қатысушыларды Орталық мемлекеттік архивтің 100 жылдық мерейтойымен құттықтап, ғасыр бұрын құрылған архивтің мерейтойы - тарихи санасы қалыптасқан мемлекет үшін маңызды оқиға екенін айтты. Бұдан соң Ақтоты Райымқұлова бірқатар архив саласының қызметкерлерін «Архив саласының үздігі» төсбелгісімен және «Қазақстан Республикасының орталық мемлекеттік архивіне – 100 жыл» мерейтойлық медалімен марапаттады.