2021 жылдың қараша айынын 26 күні Нұр-Сұлтан қаласында Қолжазбалар және сирек кітаптар ұлттық орталығында «Қазақстандағы жазба мұралардың реставрациясы және сақтау мәселелері» тақырыбында республикалық ғылыми-тәжірибелік семинар өтті. Оған Орталық мемлекеттік ғылыми-техникалық құжаттама архивінің қос бірдей қызметкері, ақпараттық технологиялар және цифровизация бөлімінің жоғары деңгейлі білікті маман-архивистері Абайбол Омарбеков және Азат Көпешов қатысты.
Семинардың ашылуында Мәдениет және спорт министрі Ақтоты Райымқұлованың құттықтау хаты оқылып, министрлікке бағынысты Архив істері және құжаттаманы басқару комитетінің төрағасы Қ.Қ. Бораш, «ҚР Ұлттық архиві» РММ директоры С.Е. Нұрланова қатысушыларға сәттілік тілеп, семинардың жемісті өтуіне тілектестігін білдірді.
Ауқымды шара барысында архивтік құжаттарды қалпына келтіру және консервациялау, қағаз құжаттарды қалпына келтіруде заманауи жабдықтарды пайдалану, реставрациялау мәселелері туралы елімізге белгілі мамандар арнайы баяндама жасап, келелі мәселелердің шешімдері талқыланды.
Сондай-ақ іс-шара барысында «Қолжазбалар және сирек кітаптар ұлттық орталығы» РММ Реставрация және консервация зертханасында реставрациядан өткен Абай Құнанбайұлының 1909 жылы шыққан өлеңдер жинағын «Абайдың «Жидебай-Бөрілі»мемлекеттік тарихи-мәдени және әдеби-мемориалдық қорық-музейі» РМҚК-на салтанатты түрде табыс етті. Бұл іс-шараның деңгейін асқақтата түсті. Сонымен қатар Нұр-Сұлтан қаласының мемлекеттік архивінің қызметкерлері Е.М.Уалихан, А.Ж. Кокумбаева жапон қағазын қолданып, дәстүрлі реставрация жасау тұрғысынан арнайы мастер-класс өткізді.
Семинар соңында қатысушыларға арнайы сертификат табыс етілді. Сондай-ақ, оларға Ұлттық архивтің көрме залы мен реставрция және консервация бөлімінің жұмыстары көрсетілді.