Балаларды қорғау күні және Республика мектептерінде соңғы қоңырау мерекесі қарсаңында Орталық мемлекеттік ғылыми-техникалық құжаттама архивінің қызметкерлері балаларымен ZOOM платформасында онлайн режимде кездесу өткізді.
Ең алдымен оқушыларды оқу жылының аяқталуымен құттықтап, жазғы демалысын қызықты өткізулеріне тілектестік білдірді. Архившілер балаларға ата-аналары жұмыс жасайтын архив туралы қарапайым және қолжетімді түрде әңгімелеп берді.
Атап айтқанда, Орталық мемлекеттік ғылыми-техникалық құжаттар архивіне қандай құжаттардың мемлекеттік сақтауға қабылданатыны, оларды сақтауға қандай оңтайлы жағдайлар жасалғаны, бұл құжаттардың жинақтар шығару және көрмелер өткізу арқылы оларды танымал ету үшін қалай пайдаланылып жатқаны, сондай-ақ, халқымыздың бірегей тарихи мұрасын қалпына келтіру арқылы «өмірін» қалай ұзартатыны жайлы әңгімелеп берді.
Архив қызметкерлері жылдар өте келе осы балалардың біреуі сапалы білім алып, мемлекетіміздің ғылымы мен техникасының дамуына елеулі үлес қосуы мүмкін екендігін айтты. Тіпті ОМҒТҚА жеке тектік қорын ашып, оны құнды құжаттармен толықтырар деген сенім білдірді.
Онлайн басқосу соңында архив қызметкерлері мектеп оқушыларын архивке келіп, еліміздің бірегей құжаттық мұрасын сақтау жолындағы игілікті миссияны атқарып жүрген ата-аналарының қандай еңбек істеп жатқанын өз көздерімен көруге шақырды.